Ye facil facer de menos a les minories

Articulu de José Carlos Loredo y Carlos X. Blanco. Asoleyau en Elcomentario.tv

Dientro d’eso que davezu recibe’l nome de “mundín asturianista” -como si fuere daqué separtao de la sociedá asturiana normal- repítese en cada convocatoria eleutoral el mesmu pruyimientu: ¿por qué n’Asturies nun termina d’espoxigar el nacionalismu políticu? ¿Por qué vamos empobinaos a un bipartidismu como’l de La Mancha o Estremadura? Inclusive en Cantabria y La Rioxa, nun teniendo de mano más entidá nacional qu’Asturies, dellos partíos que polo menos son rexonalistes algamen representación institucional enforma como pa facer de llaves nos parllamentos autónomos o pa facer sentir la so voz minoritaria pero arguyosa. Tres la presencia nel pasáu d’un asturianista na Xunta, equí nun s’escucha una voz tala.Quiciás depués de la industrialización y el so desaniciu, coles inmigraciones de xente foriato y les migraciones de rentes producíes pol trabayu y de xente mozo, la personalidá nacional foi diliéndose nun procesu que, emprimáu cuantayá, ta entainando. Faltó capital indíxena, faltaron élites propies que nun naguaren por medrar en Madrid, faltó muncho pa llograr esa masa crítica de nacionaliegos que n’otres comunidaes salieron del armariu acabante morrer Franco. Equí tuvimos una basa nacional membruda hasta’l sieglu XX. El nuestru dieldu cultural alicó cuasi hasta güei, calteníu por mayoríes populares non sólo rurales sinón tamién urbanes -les ciudaes taben mui ruralizaes, nel meyor sen de la pallabra-. La oportunidá, mui tarazada depués de décades d’españolismu xabaz y torgada tamién pola feble voluntá popular asturiana, vieno nos años 70 con Conceyu Bable, qu’aperió un resurdimientu asemeyáu al que taben entamando daquella otres comunidaes del Estáu. Ensin dulda, el nacional! ismu astur ha ser autocríticu. Los fechos (eleutorales, sobre too) tan ehí y son testerones. Pero dientro d’esi enclín críticu convién pescanciar cuála ye la llende ente lo que ye nacionalismu y lo que non.Nun ye obligatorio ser asturianista, nacionalista, rexonalista, autonomista, de dreches, d’esquierdes nin de nada. Ye nidio que caún pue pensar lo que-y pete y votar en consecuencia (o astenese). Lo que pasa ye que val más nun engañase coles promeses y asitiamientos d’unos y d’otros. Los que creyemos na realidá nacional d’Asturies tenemos falta autocrítica, dende llueu, pero pueque tamién tengamos derechu a pidir dalgo de respetu pa con nós, de memoria hestórica colectiva y hasta de vergoña a la hora d’opinar sobre les opciones polítiques nacionaliegues. En Les Noticies del 25 de mayu pasáu coincidieron dos opiniones que, magar qu’asoleyaes unos díes enantes de les eleiciones, espeyen dalgo del clima de resaca eleutoral que carecemos. Rafael Palacios, cabezaleru del Bloque por Asturies, perdóna-yos la vida nuna entrevista a los de la coalición Unidá (Izquierda Asturiana, parte d’Andecha Astur y Los Verdes-Grupu Verde) y amuesa’l so despreciu pa cola parte d’Andecha Astur que! nun s’integró en tala coalición: “toi convencíu de que nel 2011 [Unidá y el Bloque] vamos formar parte de candidatures unitaries… Andecha Astur queda nel reductu nel que tenía de tar dende va munchu tiempu… Cuando Nacho Llope diz qu’ésti ye’l peor Gobiernu de la historia sabe que ye mentira”. Palacios fala claro al dicir que l’apueste del Bloque ye l’entrismu, esto ye, influyir dende dientro les instituciones y el gobiernu. Perfecho. Tán nel so derechu. Sicasí, esprecetar escontra los que nun arrenuncien a los sos principios por averase al gobiernu ye poco elegante.Francisco Álvarez, militante del mesmu Bloque por Asturies, escribe un artículu au retruca a delles opiniones del cabezaleru d’Unidá Nacho Llope. Nél fai de menos a Izquierda Asturiana y fanfarria diciendo que’l Bloque “nació cuatro meses enantes de les elecciones de mayu del 2003 y … edificó en 120 díes un proyectu básicu pa empezar a trabayar, infiltrase na negociación d’un pactu tripartitu…, asumir una presencia nel Executivu con aciertos y desaciertos…, xestionar una dirección xeneral qu’esportó la solidaridá d’Asturies a mediu mundu y despidir la llexislatura con cinco conceyales…, lo que lu convierte na segunda fuerza política asturianista en presencia municipal”. Izquierda Asturiana llevaba trabayando dende 1992 y Andecha Astur dende 1990, y a pesar d’ello nunca nun algamaron representación na Xunta; poro, dende’l puntu de vista de Francisco Álvarez son tochos, seique demasiao radicales o como él mesmu diz- poco serios, inmaduros y aburríos.Lo qu’a dalgunos mos dexa ablucaos ye que se defenda como dalgo bono remanar una organización política nacionaliega d’esquierda en cuatro meses y metela nes instituciones dexando na cuneta a los nacionalismos d’esquierda que veníen trabayando dende más de diez años por unos oxetivos bien abegosos de llograr. O los del Bloque son más llistos que naide o hai daqué sospechoso. L’estudiu del surdimientu d’esta organización queda pa los hestoriadores del nacionalismu asturianu o de la inxeniería ellectorial creativa, pero nun hai d’escaecer que los sos nicios pudieron tar venceyaos a la necesidá de que la esquierda “internacionalista” tradicional -comunista o socialcristiana, que son les dos tendencies d’Izquierda Xunida n’Asturies- controlara un satélite que-y permitiera rebañar los votos d’un asturianismu al que paez que-y da vergoña reconocese como nacionalista, que ye como se reconocen IAS y Andecha. Esta ye una estratexa llexítima, nun faltaba más; pero d’ehí a facer de meno! s a los que vienen trabayando dende abaxo pol nacionalismu asturianu d’esquierda hai un saltu dalgo ofensivu. L’entrismu ye una opción tan respetable como cualquier otra. Ensin embargu la hestoria de recién tiennos dicho que pue valir pa xustificar l’afondamientu nel desaniciu d’Asturies que se vien prauticando dende los años 80, un afondamientu que, entós, queda atapecíu cola disculpa de coses como una Llei d’usu y promoción del “bable” que pa encima malapenes se cumple, l’emplegu cuasi decorativu de la llingua nos comunicaos y los cartelos d’una conseyería o les sovenciones pa llibros y aconceyamientos d’escritores.Quiciabes seya verdá que’l nacionalismu nun ye quien a treslladar el so mensaxe a la sociedá. Sicasí, tampoco hai que cayer nel afalagamientu del pueblu y echa-yos toles culpes a les organizaciones verdaderamente nacionaliegues. Viendo los resultaos de les últimes eleiciones, paez que bona parte los asturianos tan bien como tan. Paez que l’alderique afítase namás en si se privaticen más o menos servicios o si se constrúin más o menos autopistes, más o menos térmiques, más o menos llinies d’alta tensión, banzaos, etc. Izquierda Xunida, el Bloque y Los Verdes van pone-y al nuevu gobiernu la nota de color y la pantalla ideolóxica de la retórica d’esquierdes y “asturianista”. El mieu a la pallabra “nacionalista” ye cosa d’estudiar polos psicólogos asturianos. La pantalla izquierdista-asturianista valdrá-yos a dalgunos pa enfotase en les migayes que’l presidente Areces vaya soltando embaxo la mesa según-y convenga. García Valledor, el conseyeru d’Izquierda Xunida, yá dixo va poco! que’l tema de la llingua tampoco ye tan importante. Depués de regalar armes al enemigu hai delles selmanes entemeciendo l’asturianu col conceutu d’”imposición”, agora tán preparando’l terrén p’aplazar la oficialidá otra vegada.Si na sociedá asturiana nun cala’l nacionalismu, qué-y vamos facer: nun cala. Hai enfallos en dalgunos de los sos cabezaleros y engarradielles que nun s’entienden, falten preseos de comunicación afayadizos pa llegar al pueblu, y el llabor de los gobiernos españoles a comuña cola burguesía asturiana fixo los deberes a tiempu pa neutralizar una conciencia cultural difusa, un sentimientu y una llingua, coses qu’abenayá llevaben apareyaes un valir d´inferioridá y acomplexamientu: xusto lo que’l poder pue aprovechar pa desencadarmar un nacionalismu qu’anicia, basáu precisamente nel arguyu polo propio. Andecha y IAS, quiciás dalgún día xuntes daveres, tienen el retu d’espeyar políticamente esi arguyu enxamás alcontráu o seique perdíu, y quiciabes tamién el d’atropar les fuercies que, anguaño menos a la esquierda, sienten igualmente la necesidá de camudar esi autoodiu tan típicu del pueblu asturianu sustituyéndolu por un arguyu alloñáu de folclorismos. Delles veces da-y a ún la imp! resión de que ta too por facer. Hai que xuntase, salir de les sectes y los insultos, facese respetar énte’l propiu pueblu y, penriba de too, nun engañase nin tracamundiar. El nacionalismu -minoritariu, sí- val más que nun se dexe tracamundiar nin llevar polos cantos de serena del entrismu. Delantre de les ofienses y les acusaciones interesaes de radicalismu, podía retrucase aquello que cantaben los Ilegales cuantayá: “Todo lo que digáis que somos / lo somos y aún peor”.